ILLA DE ONS

CULTURGAL 2011

2011-12-01T21:36:00.008Z

Chega o Culturgal. Tres días de presentacións, conversas, produtos e todo tipo de propostas culturais concentradas. Un total de 130 actividades enchen a vindeira fin de semana o Pazo da Cultura e mais a Cidade de Pontevedra.

Culturgal é o fogar da cultura galega. Unha gran casa construída entre os distintos gremios da cultura: libro, creación audiovisual, artes escénicas, música, deseño, internet e novas tecnoloxías. Un fogar coas portas e ventás abertas sempre cara á sociedade.

Culturgal celebra un evento anual que conxuga o encontro profesional coa presentación, promoción e venda aberta ao público de produtos e servizos. Para facelo, válese de dúas patas fundamentais: a Feira e o Foro. A Feira das Industrias Culturais de Galicia achega ao público ás novidades editoriais, o último en música, o glamour do audiovisual, a maxia das artes escénicas, os avances das novas tecnoloxías e mesmo as propostas máis marxinais en tres días de actividade sen tregua para os públicos máis variados. O Foro Culturgal, pola súa banda, é un lugar de encontro privilexiado para os axentes do sector, un espazo para a reflexión e a aprendizaxe, no que intercambiar experiencias e imaxinar novos proxectos baseados na colaboración e no apoio mutuo.

Culturgal é a mellor radiografía dun sector industrial cohesionado, forte, dinámico e moderno que se enfronta a un momento crucial, cheo de grandes cambios, coa despensa chea de ideas e de solucións colectivas para os retos que trae o futuro.

Preme na seguinte ligazón:
PROGRAMA DE ACTIVIDADES 2, 3 , 4 DECEMBRO 2011

Revista Umbrela Nº 16. Xuño 2011

2011-06-16T09:58:00.008+01:00

Xa saíu o último número da revista Umbrela do IES ILLA de ONS, o seguinte artigo é un máis dos que conten.

Barcelona.

Sara Calviño Ferreira 4ºB

Dende o ceo, dende arriba, entre as nubes, sénteste minúsculo.

Pensar que ti vives aí abaixo e que simplemente es unha mole de carne entre tanta xente faite sentir iso, nada.

Canda fun a Barcelona por primeira vez tiña seis anos. Só recordo un xeado de coco nunha praia e agora, despois de dez anos sei que esa praia se chama a Barceloneta.

Agora, aquí nun asento, creo que o 18, sinto a presión nos meus oídos, como si non me fora permitido estar aquí, entre o ceo, como un Deus máis, como se os paxaros foran os únicos capaces de voar.

Non puiden despedirme da miña irmá, estaba no colexio cando collín a maleta para irme cos meus pais ao coche.

O comandante fala, en vinte minutos estamos na segunda capital de España: Barcelona... Si, con puntos suspensivos, como na banda sonora dunha peli de Woddie Allen, na que a nosa Pé gañou un Óscar.

Aterraxe, cheiro a queroseno, calor, moita calor, turistas e Paz.

Isto non é como Madrid, aquí a xente mírate con ese brillo nos ollos que alí tanto escasea, a xente vai en bicicleta en harmonía cos carteristas das Ramblas e as estatuas humanas que viven á espera de que as espertemos.

O ceo é azul a pesar de ser cidade e nos parques hai música de todas as culturas: "Benvidos ao parque Güell, o parque cosmopolita" onde as píntegas pousan mellor que as modelos e donde as avespas atacan as profesoras.

- Mátala, mátala!- Grita o seu alumno.

Pobre avespa, seguro que acabou asustada ante cada movemento que lle manifestaba unha morte segura.

A Sagrada Familia, tan grande, tan elegante pousa ante os turistas e Gaudí escóndese nas chemineas da casa da Pedrera e nos cores da outra coma unha serea máis.

Saída do albergue.

Embarque no avión.

Adiós, Barcelona, adiós.

Valoremos o que é noso!

2011-05-23T22:24:00.003+01:00

As linguas suman

2010-12-10T19:21:00.000Z

Celtic Roots - The Anthem from Casa de Tolos on Vimeo.

CONTACONTOS . CHARO PITA E TIM BOWLEY

2010-11-23T09:32:00.003Z

O luns 22 de novembro estiveron no centro estes dous contadores de historias.
Actividade feita conxuntamente entre o Equipo de Dinamización Lingüística e a Biblioteca e os departamentos de Galego e Música .

TROPA DE TRAPO

2010-11-15T22:35:00.005Z

O outro dia viñeron ao instituto uns contacontos que se chamaban : "A tropa de trapo". Contáronnos tres contos:

-O de Leila: Unha historia triste e emocionante á súa vez.

-O de Ramón: Unha historia graciosa según de como se conte, desas que depende de quen as conte teñen máis graza ou menos.

- E o de Mohamed: unha historia que se parecia máis a unha fábula pero sen animais que falaban.

O que máis me gustou deses foi o de Leila. máis que gustarme emocionoume. O final era moi triste porque ela acababa morrendo e el esquecéndose dela.

Despois disto tivemos un taller e foi moy divertido. Arapaza era moi riquiña e fíxonos xogos de miradas, de atender,... e pasamos un bo rato en compañía.

SUSANA LÓPEZ 1 º B

TRABALLANDO A ORALIDADE...

2010-11-09T00:20:00.003Z

O venres día 5, dúas alumnas do noso instituto, IRIA PIEDRAS e PATRICIA COMEDEIRO foron ao centro de infantil do CEIP "A PEDRA" a contarlles aos neno@s de 5 anos 3 contos.
O 1º libro que contaron foi : QUE TAL, VEXETAL?

DESGUSTADO?
SEN NENGUN MEDO?

ESTÁS LEDO?
ESTÁS TRISTE?

CANTOS SORRISOS LOGO?
A VER SE O ADIVIÑAS:
QUEN SE SENTE SEGURO?

O SEGUINTE CONTO FOI Rato Tom e Rata Tomasa

Un día rata Tomasa mandoulle a Tom unha invitación.

Invitote a biscoito hoxe as oito.

E o último conto que lle contaron foi a
Colección de Galletas.
Galletas da avoa, linguas de gato,
galletas de can, bicos de Lulú...

2010-10-25T09:00:00.003+01:00

Interesante iniciativa da CGENDL, para mostrar que o galego sirve en todos os ámbitos da vida.
A Xornada pola Ciencia en Galego, en colaboración cos colectivos de docentes de matemáticas, ciencias e tecnoloxía e outras entidades, se dirixe dende o ensino a toda a sociedade co obxectivo de expresarmos que o galego é unha lingua adecuada para a transmisión do coñecemento científico e tecnolóxico e para divulgar experiencias científicas escolares pensadas e desenvolvidas en galego.

17 de Maio.Día das letras Galegas con Uxio Novoneyra

2010-05-12T23:55:00.002+01:00

Feito polo equipo de Normalización Lingüística do CEIP Quintela de Moaña.

Orgullosos do noso, orgullosos do galego.

2010-02-23T07:58:00.007Z

Campaña da Coordinadora Galega de Equipos de Normalización Lingüística a prol do galego.Podedes ver os vídeos con figuras da cultura galega apoiando a campaña.

Novo libro"55 mentiras sobre a lingua galega"

2010-02-11T09:18:00.004Z

Presentouse o venres 5 de febreiro en moitas vilas do pais e noutras cidades do estado e do resto do mundo a primeira publicación de Prolingua.
É unha publicación que fai unha análise dos diversos prexuízos máis comúns que hai sobre o noso idioma.
Está escrito nunha linguaxe clara , e que vai a permitir botar luz sobre ideas que estaban instalándose no noso pobo e que non responden a realidade da nosa historia pasada e presente.

Guías de lectura para secundaria

2009-12-13T14:41:00.003Z

Polo Nadal regala libros en galego !.
Aí vos vai unha selección feita pola Coordinadora DE EQUIPOS DE NORMALIZACIÓN LINGÜÍSTICA DO MORRAZO .

Tamén podedes ver as guías de infantil e primaria.

Primaria:

ACHEGARTE, PROMOCIÓN DA CULTURA GALEGA

2009-11-30T18:30:00.003Z

ANXO FARIÑA PRESENTANDO OS MEGATOXOS

2009-11-25T00:30:00.002Z

O día 23 presentoulle aos alumnos de 1º da ESO o seu 3º libro da serie dos megatoxos, acabado de saír do prelo." OS MEGATOXOS E OS TEMPLARIOS DA LUZ".
En datas vindeiras darémoslle publicidade á entrevista que lle ían facer os moz@s.

Comentario falado do libro "rebeldes"

2009-11-23T19:21:00.001Z

Fálanos do libro Daniel Piñeiro de 3º da ESO.

MAGOSTO 2009

2009-11-09T20:22:00.005Z

A festa do magosto non podía faltar un ano máis entre nós.
O día cuberto de neboeiros mestos e a poalla lenta e constante non nos amedrentou, e continuamos coa fixa idea de facelo no día programado.
Castañas picadas, paus e carozos listos para queimar e a tropa de 4º da ESO cos ánimos despregados para comezar o traballo.
Adiante co lume !, adiante coas castañas !, adiante coa música e o baile dos nosos compañeiros e compañeiras !, adiante un ano máis o magosto no illa de ONS .

1ª ASEMBLEA DA CGENDL.SANTIAGO 7-11-2009

2009-11-07T22:45:00.006Z

"NON TEREMOS MEDO NIN PREGUIZA PARA TRABALLAR A PROL DA NOSA LINGUA"

Valentina Formoso, elixida coordinadora xeral este sábado na primeira asemblea da CGENDL, resumiu deste xeito as liñas de actuación do colectivo para o futuro inmediato. Ademais, denunciou o recorte dos apoios institucionais.

No transcurso da asemblea, na que se escolleu por unanimidade o Consello Directivo para os próximos dous anos, aprobáronse os principios que rexerán o colectivo e o seu plano de traballo anual. Entre as actividades previstas está unha campaña de sensibilización dirixida á comunidade escolar; programas de intercambio entre estudantes; e o fomento do galego nas novas tecnoloxías.

QUE É A COORDINADORA GALEGA DE ENDL (CGENDL)?
A Coordinadora Galega de ENDL (Equipos de Normalización e Dinamización Lingüística)
está formada por equipos de centros públicos, privados e concertados, e deles formamos
parte profesionais do ensino que levamos anos traballando a prol do galego; persoas de
ideoloxías moi plurais, unidas por un mesmo ideario lingüístico: o galego é a lingua
propia de Galicia, tal e como di o noso Estatuto de autonomía.
A Coordinadora naceu en abril de 2009 e foi creada coa intención de coordinar
actividades e experiencias dos equipos de toda Galicia, e ademais servirlle de voz pública
aos ENDL que traballan nos centros de ensino.
A CGENDL non se sumará como tal a ningún colectivo, aínda que poderá impulsar
accións e todas aquelas actividades coherentes cos seus obxectivos.
OBXECTIVOS DA COORDINADORA
1. Contribuír ao fomento da lingua galega nos centros de ensino.
2. Organizar accións conxuntas para todos os ENDL para optimizar recursos e
enerxías.
3. Potenciar o intercambio de experiencias.
4. Coordinar as actuacións entre os diferentes centros.
5. Contar cunha voz representativa do colectivo de ENDL nas relacións coas
administracións (Xunta, deputacións, concellos, servizos de normalización, etc.);
6. Funcionar como plataforma de intercambio, tanto de actividades dos equipos como
de formación, isto é, dinamizar e asesorar.
7. Ofrecerlle ao conxunto do colectivo materiais innovadores de apoio didáctico e
recursos de interese.
8. Propiciar o encontro con persoas e organizacións vinculados ás tarefas
normalizadoras.
9. Visualizar na sociedade o traballo dos equipos a través de canles de divulgación e
comunicación sólidas .
QUE QUEREMOS?
1. QUE a lingua galega siga sendo parte do noso patrimonio cultural e da nosa
identidade e, como tal, un ben común que nos une.
2. QUE se garanta que todo o alumnado sexa competente nas dúas linguas cooficiais
da Comunidade ao final do ensino obrigatorio. Só a partir do coñecemento e da
ausencia de prexuízos lingüísticos é posible a liberdade de elección de linguas.
3. QUE na actual situación sociolingüística de Galicia, na que o galego está a perder
falantes -como demostran os datos do Mapa Sociolingüístico de Galicia- o sistema
educativo ofreza ao alumnado espazos de uso, porque as linguas apréndense
usándoas.
4. QUE non se discrimine o alumnado por razón de lingua, tal e como se regula na
Constitución Española no artigo 14 e no Estatuto de autonomía de Galicia no artigo
5.4.
5. QUE o noso alumnado estea formado para poder desenvolverse nunha Europa
plurilingüe. Diversos estudos demostran que o alumnado de comunidades bilingües
obtén iguais ou mellores resultados académicos cós das comunidades
monolingües.

2009-09-11T23:18:00.002+01:00

Animación divertida de Portugal dando pequenos consellos de como evitar a propagación da gripe A

DEBUXOS ANIMADOS , ANIMANDO Á PREVENCIÓN

2009-09-11T23:10:00.004+01:00

2009-06-26T17:27:00.005+01:00

Reunión da coordinadora de equipos de normalización co conselleiro de educación e máis o secretario xeral de política lingüística

Propostas para o consenso da Coordinadora Galega de ENDL.

2009-06-26T16:50:00.002+01:00

A Coordinadora Galega de Equipos de Normalización e Dinamización Lingüística (CGENDL) quere mostrar a súa preocupación e malestar ante a polémica que se orixinou nos últimos tempos arredor da lingua galega no ensino. Esta polémica é moi negativa para a convivencia nos centros e polo tanto para a educación en xeral e para a lingua galega en particular. Por este motivo a CGENDL quere facer algunhas PROPOSTAS PARA O CONSENSO:

1. O marco lexislativo educativo ten que evitar a confrontación na comunidade escolar.
2. O alumnado non pode ser segregado por razón de lingua.
3. Débese garantir a presenza do galego no ensino ao 50% como mínimo para poder acadar a competencia nas dúas linguas cooficiais. Só así o alumnado poderá escoller en liberdade.
4. Téñense que elaborar materiais didácticos, de calidade e actualizados, en lingua galega para todas as materias e todos os ciclos educativos, que suplan as carencias existentes.
5. Hai que ofrecerlle ao profesorado cursos de reciclaxe e capacitación en lingua galega; para isto é imprescindible contar cun programa previo de formación de formadores.
6. Cada centro debe seguir elaborando o seu Proxecto lingüístico, que é a base para que os ENDL desenvolvan as súas funcións unha vez analizada a situación sociolingüística do centro.
7. Decreto de infantil.
1. Nesta etapa débese garantir que o alumnado adquira de forma oral e escrita o coñecemento das dúas linguas oficiais tendo en conta que a lingua minorizada precisa de maior reforzo.
2. Propoñemos que avalíen os resultados das liñas de galego en infantil de cara a manter este programa. Os informes elaborados nestes centros valoran moi positivamente estes proxectos xa que permitir
on conseguir que todo o alumnado adquirise a competencia nas dúas linguas oficiais, fose cal fose a lingua inicial dos rapaces e rapazas.
8. Equipos de Normalización e Dinamización.
1. Débense implementar programas de formación en dinamización lingüística para o profesorado interesado.
2. Hai que potenciar as coordinacións intercentros.
3. Téñense que consolidar as funcións das coordinadoras provinciais dependentes da SXPL.
9. A administración debe realizar campañas efectivas de dignificación da lingua, que comecen polo propio goberno da Xunta. A situación do galego é moi delicada, por iso algunhas accións e declaracións realizadas nos últimos tempos cuestionan o labor de recuperación do galego feito ata o momento.
10. Parécenos inadecuado que a enquisa sexa a base dun decreto novo. Esta consulta, tal e como foi realizada, non pode ter ese peso nunha lexislación educativa. En cambio, débense ter en conta conta os diferentes datos sociolingüísticos existentes tirados de estudos elaborados con rigorosidade (MSG, IGE), así como os diferentes Proxectos Sociolingüísticos de Centro realizados nos últimos anos.

Por todo isto desde a CGENDL, como parte fundamental do sistema educativo, queremos participar na elaboración de calquera documento que lexisle o uso das linguas no ensino.

PRECONCEPTOS SOBRE AS LINGUAS

2009-06-18T23:30:00.003+01:00

Conferencia do profesor Juan Carlos Moreno Cabrera da universidade autónoma de Madrid
falando das linguas,en pasado, presente e futuro.

RUBÉN RÍOS DIRECTOR DA CURTOMETRAXE COSER E CANTAR

2009-06-16T23:05:00.004+01:00

MANIFESTO DA COORDINADORA DE ENDL DE GALICIA

2009-06-08T19:37:00.004+01:00

http://www.coordinadoraendl.org/index.php

2009-06-08T19:20:00.003+01:00

APOIA COA TÚA FIRMA O IDIOMA

2009-06-08T19:11:00.003+01:00

A nosa firma é unha das letras que forma parte das miles de palabras do noso idioma !.

Adhesión de docentes

1. Este decreto desenvolve o Plan xeral de normalización da lingua galega, aprobado por unanimidade no Parlamento de Galicia no ano 2004 e elaborado, na parte referida á educación, por unha comisión na que se integraban representantes das ANPAS, do profesorado, das organizacións pedagóxicas e das patronais do ensino concertado.

2. Supón a superación dunha lexislación, o Decreto 247/95, que -despois de 12 anos de aplicación- tiña demostrado que non estaba respondendo aos obxectivos para os que fora deseñada, tal como poñen de manifesto os últimos datos do Mapa Sociolingüístico de Galicia.

3. Persegue como finalidade última que o alumnado acade, ao rematar os seus estudos, unha plena competencia lingüística que o capacite para expresarse oralmente e por escrito nas dúas linguas oficiais de Galicia, no marco dun ensino plurilingüe.

4. Favorece que cada centro elabore o seu propio Proxecto lingüístico, documento que debe ser aprobado polo Consello Escolar e que, polo tanto, require a implicación e o consenso de toda a comunidade educativa: profesorado, alumnado, pais/nais, persoal non docente e representantes dos concellos.

Dado que consideramos as medidas que se establecen no decreto como unha achega importante na tarefa dinamizadora e normalizadora que realizamos nos centros e que non pasou tempo suficiente para avaliar se os seu resultados satisfán os obxectivos para os que foi aprobado, solicitámoslle ao novo goberno que manteña os compromisos acordados pola comunidade educativa e o Parlamento galego no Plan xeral de normalización da lingua galega.

http://www.coordinadoraendl.org/docentes.php?#anc

Coordinadora Galega de ENDL

QUE É UN ENDL (Equipo de Normalización e Dinamización Lingüística)?

É un órgano consultivo e dinamizador dos centros de ensino para os eidos lingüístico e cultural. Forma parte da estrutura administrativa, docente e didáctica dos centros e está integrado por mestres/as e profesores/as dos distintos niveis, por alumnos/as (cando a idade o permite) e por representantes do persoal non docente.

A súa función primordial é conseguir que os alumnos/as poidan chegar a ser competentes na lingua galega e usala digna e normalmente.

QUE É A COORDINADORA GALEGA DE ENDL?

A Coordinadora Galega de ENDL (Equipos de Normalización e Dinamización Lingüística) é unha plataforma creada coa intención de coordinar actividades e experiencias, e ademais servirlle de voz pública aos ENDL que traballan nos centros de ensino.

Está formada por Equipos de centros públicos, privados e concertados, e deles formamos parte profesionais do ensino que levamos anos traballando en prol do galego; persoas de ideoloxías moi plurais, unidas por un mesmo ideario lingüístico: o galego é a lingua propia de Galicia, tal e como di o noso Estatuto de Autonomía.

QUE QUEREMOS?

QUE a lingua galega siga sendo parte do noso patrimonio cultural e da nosa identidade e, como tal, un ben común que nos une.
QUE se garanta que todo o alumnado sexa competente nas dúas linguas cooficiais da Comunidade ó final do ensino obrigatorio. Só a partir do coñecemento e da ausencia de prexuízos lingüísticos é posible a liberdade de elección de linguas.
QUE na actual situación sociolingüística de Galicia, na que o galego está a perder falantes como demostran os datos do Mapa Sociolingüístico de Galiciao sistema educativo ofreza ó alumnado espazos de uso, porque as linguas apréndense usándoas.
QUE non se discrimine o alumnado por razón de lingua, tal e como se regula na Constitución Española no artigo 14 e no Estatuto de Autonomía de Galicia no artigo 5.4.
QUE o noso alumnado estea formado para poder desenvolverse nunha Europa plurilingüe. Diversos estudos demostran que o alumnado de comunidades bilingües obtén iguais ou mellores resultados académicos cós das comunidades monolingües.

O GALEGO NA COMUNICACIÓN CIENTÍFICA

2009-05-30T00:21:00.002+01:00

Científicos galegos no exterior fan público un manifesto en defensa da lingua
Artigo publicado en VIEIROS
vieiros
Nove destacados investigadores, vencellados ao Centro Europeo de Investigación Nuclear (CERN), dan un paso adiante para rebater prexuízos lingüísticos.

O forte debate sobre a normalización lingüística que se está a dar no noso país nos últimos meses trascende as nosas fronteiras. Un grupo de nove científicos galegos vinculados ao Centro Europeo de Investigación Nuclear (un dos máis prestixiosos do mundo) acaba de dar un importante (polo seu simbolismo) paso adiante en defensa da lingua do país. Nun manifesto que remiten a Vieiros subliñan que, contra o que sosteñen algúns, o galego é un idioma plenamente válido para a investigación científica.

Ofrecémoslles o manifesto íntegro:

Unha achega ao debate sobre o galego desde o CERN
Somos un conxunto de físicos e enxeñeiros galegos vencellados ao Centro Europeo de Investigación Nuclear (CERN) en Xenebra, a día de hoxe uns dos laboratorios científicos máis importantes do mundo. Desde a distancia, levamos meses asistindo ao debate que se está a xerar sobre a posición que debe ocupar a lingua galega no noso sistema educativo. Esta cuestión está a provocar unha confrontación continua de posturas e opinións que se estende a distintos ámbitos da nosa sociedade. Se ben consideramos este debate lexítimo tamén coidamos que as posturas deben ser mantidas e defendidas desde a máis absoluta rigorosidade, a mesma pola que nós estamos rexidos nas nosas actividades científicas. E vémonos na obriga de intervir cando determinados argumentos que non seguen esta máxima aparecen por parte de persoas cunha opinión que non se restrinxe ao ámbito privado.

En declaracións ao “Faro de Vigo”, o voceiro da “Confederación das Asociacións de Pais de Alumnos de Colexios Concertados” (Congapa), José Ramón Hermida, dicía: “Utilicemos el sentido común. Químicas o Físicas, con tantas nomenclaturas internacionales, no se pueden dar en gallego. No podemos retroceder”. Ben, for desde a ignorancia, for intencionadamente, declaracións deste tipo resultan totalmente inadmisíbeis. E dicimos isto con coñecemento de causa, pois no noso ámbito de traballo estamos acostumados a ter conversas de alto nivel científico de temas moi diversos en galego. Nun entorno no que temos a sorte de traballar con algúns dos mellores físicos e enxeñeiros do mundo, o galego está, modestamente a través de nós, presente como vehículo de comunicación científica. E para isto é un idioma exactamente igual de válido que o francés, o alemán ou, desde logo, o castelán. Ben é certo que o galego non é empregado para as comunicacións nin publicacións científicas a grande escala, pero é necesario que se saiba que tampouco o é o castelán. A lingua franca da ciencia desde hai moitos anos é o inglés, e desde logo se algunha lle discutíu no pasado tal condición esa non foi o castelán.

O noso obxectivo con esta carta é simplemente evitar que se empreguen argumentos falsos (ou falseados) na discusión dun tema tan delicado e importante coma este. E tamén reivindicar o galego como lingua que nos identifica sen excluírnos estando como estamos lonxe da casa.

No CERN en Xenebra, a 26 de Maio de 2009,

Xabier Cid Vidal, Licenciado en Física e estudante de Doutoramento - USC, experimento LHCb.
Patricia Conde Muíño, Doutora en Física de Partículas, Investigadora do LIP (Laboratório de Física e Instrumentação de Física de Partículas) - Lisboa (Portugal), experimento Atlas.
Daniel Esperante Pereira, Enxeñeiro de Telecomunicacións e estudante de Doutoramento na USC, experimento LHCb.
Teresa Fonseca Martín, Doutora en Física de Partículas, investigadora asociada da Royal Holloway University - Londres (Reino Unido), experimento Atlas.
Abraham Gallas Torreira, Doutor en Física de Partículas, investigador Ramón y Cajal na USC, experimento LHCb.
Manuel Gallas Torreira, Doutor en Física de Partículas, antigo staff do CERN no departamento de Física Experimental.
Marcos Mariño Beiras, Doutor en Física de Partículas, Catedratico de Física Matemática na Universidade de Xenebra (Suíza).
Diego Martínez Santos, Licenciado en Física e estudante de Doutoramento - USC, experimento LHCb.
Cibrán Santamarina Ríos, Doutor en Física de Partículas, investigador asociado na McGill University - Montreal (Canadá), experimento Atlas.

17 MAIO. NA DEFENSA DO GALEGO

2009-05-17T23:24:00.005+01:00

Polas rúas de Santiago cheas de xente e de choiva,que non impediu que miles de galegos e galegas, nenos e nenas, mozos e mozas se manifestaran pola defensa do noso idioma.
Saíu a marcha ás 12,30 da alameda e rematou na praza da Quintana, con Mercedes Peón cantando a tódolos presentes.
No acto interveu Carlos Callón , a periodista Yolanda Castaño, a escritora Teresa Moure, o avogado Nemesio Barxa e Avelino Pousa Antelo coas súas 95 primaveras nas costas.
Rematouse o acto cantando o himno galego, e a praza estaba chea de xente, e a manifestación aínda estaba na praza de Vigo.
Tivo o acto unha segunda parte para toda a xente que non puido chegar a Quintana.
Foron dúas horas e media desfilando xente nunha serpe multicolor polas rúas de Santiago.
Na historia de Galiza non houbo unha manifestación tan multitudinaria na defensa do seu idioma.

2009-05-12T23:04:00.003+01:00

A mesa pola normalización

2009-05-12T23:01:00.001+01:00

17 DE MAIO.- Homenaxe en Santiago a Avelino Pousa Antelo, Presidente de Honra da Mesa pola Normalización
[11/05/2009]

Avelino Pousa Antelo, Presidente de Honra da Mesa pola Normalización Lingüística, recibirá unha homenaxe este xoves día 14, en agradecemento pola súa traxectoria en defensa do país e coincidindo co seu 95º aniversario.

O acto, no que se presentará o libro e documental Lembranzas e reflexións de Avelino Pousa Antelo, celebrarase a partir das oito e media do serán no Teatro Principal de Santiago de Compostela, e nel intervirán, ademais do homenaxeado, Mini e Mero, David Otero e Xan Leira.

Colaboran na organización, ademais da Mesa, a Concellaría de Cultura e Centros Socioculturais do Concello de Santiago; o Concello de Teo; a Fundación Castelao; a Fundación Alexandre Bóveda; a Fundación Pedrón de Ouro; a Fundación Fernández Flórez e Memoria Galiza.

Os nenos/as saben falar galego e Galicia?

2009-05-08T08:45:00.000+01:00

2009-04-24T09:40:00.004+01:00

As persoas que promovemos esta chamada queremos manifestar, perante as institucións de autogoberno e como aclaración perante a sociedade galega, o seguinte:

1.- O pobo galego ten dereito a que a súa lingua propia (orixinaria) sexa oficial a todos os efectos no seu ámbito territorial. Os usuarios do galego deben desfrutar no seu territorio do mesmo status legal que o castelán ten no seu.

2.- A situación do galego está moi lonxe de ser así. Non desfrutamos de dereitos lingüísticos plenos para desenvolver a nosa vida diaria con normalidade na nosa lingua na nosa terra. Son os falantes do galego os que resultan discriminados. É o galego o que corre perigo como idioma e os galego falantes os que non son debidamente respectados. Vivimos unha grande inxustiza que é a negación da igualdade e da verdadeira convivencia.

3.- Por iso, resulta realmente preocupante que, desde Madrid, con apoio de importantes medios de comunicación, haxa quen pretenda convencer á opinión pública de que o castelán corre perigo de desaparición e que os seus falantes son discriminados no noso país. Esta inversión da realidade ten como obxectivo que os falantes do galego non teñan dereitos lingüísticos e que os únicos deberes para as Administracións públicas se vinculen ao castelán.

4.- O verdadeiro problema non está na cooficialidade de idiomas como o galego, senón na actitude de quen nega a existencia de pobos e linguas diferentes no Estado español. Esta actitude si é a negación da convivencia e da igualdade. O proceso de normalización de usos do galego foi lento e, até hoxe, insuficiente para garantir o dereito a vivir nesta lingua. O que compre é respectar a legalidade vixente (Estatuto e Lei de Normalización Lingüística) e avanzar con cambios legais na dirección da igualdade e da convivencia. Xustamente a dirección contraria á proposta polos que pretenden a imposición do castelán como único idioma con dereitos e deberes para os cidadáns en todo o territorio do Estado.

5.-. Correspóndelle ao pobo galego, a través das súas institucións representantivas, definir a política lingüística acorde co criterio de cooficialidade e de lingua propia que mesmo o actual Estatuto recoñece para o noso idioma. Esperamos o compromiso das institucións de autogoberno na defensa da igualdade plena de dereitos para o galego e na aplicación de medidas a favor da normalización dos seus usos. Neste labor contarán sempre co noso apoio.

6.- Alertamos á sociedade galega para non se deixar confundir e instámola a cavilar sobre a verdadeira situación do galego no propio país. Defendemos un dereito humano elemental que nos define, ademais, como pobo diferenciado. Debemos ser firmes rexeitando todo posicionamento que persiga recortar dereitos ou retroceder no cativo camiño andado tanto nas administracións públicas, como na vida social.

Apoios ao Manifesto:

Promotores

Alfonso García Sanmartín
(presidente da Asociación Galega de Editores)

Ana Kiro

Avelino Pousa Antelo

Benigno Pereira
(presidente da Rede Galega de Empresas)

Bernardino Graña

Carlos Blanco

Carlos Callón
(presidente da Mesa pola Normalización Lingüística)

César Portela

Cesáreo Sánchez Iglesias
(presidente da Asociación de Escritores/as en Lingua Galega)

Eva Castro

Francisco Leiro

Ignacio Vilar

Isaac Alonso Estravís

Jorge Mira

Luís González Tosar
(presidente do PEN Clube – Galiza)

Manuel Gallego Jorreto

Manuel Rivas

Marcelino Fernández Mallo

Mercedes Peón

Nemésio Barxa

Sole González
(presidenta de IRIMIA)

Teresa Moure

Uxía Senlle

Xaquín Marín

Xoán Costa
(presidente da Asociación Socio-Pedagóxica Galega)

Xosé Lastra
(presidente de Nova Escola Galega)

Xosé Luís Méndez Ferrín

Xosé Manuel Pereiro
(decano do Colexio de Xornalistas)

Xosé Manuel Piñeiro

Xulia Vaquero

Xurxo Patiño
(presidente da Federación Galega de Libreiros)

Yolanda Castaño

Visitounos Anxo Fariña

2009-04-23T11:35:00.001+01:00

Actividade organizada polo departamento de galego para os cursos 1º e 2º da ESO

REGUEIFAS

2009-04-20T00:02:00.002+01:00

MANIFESTO DA COORDINADORA DE ENDL DE GALICIA

2009-04-16T11:43:00.004+01:00

Os Equipos de Normalización e Dinamización Lingüística abaixo asinantes queren manifestar a súa preocupación ante a intención do novo goberno de derrogar o Decreto 124/2007 polo que se regula o uso e promoción do galego no sistema educativo. Como dinamizadores lingüísticos, pero moi especialmente como profesionais do ensino que somos, queremos facer constar o seguinte:

1. Este decreto desenvolve o Plan xeral de normalización da lingua galega, aprobado por unanimidade no Parlamento de Galicia no ano 2004 e elaborado, na parte referida á educación, por unha comisión na que se integraban representantes das ANPAS, do profesorado, das organizacións pedagóxicas e das patronais do ensino concertado.

2. Supón a superación dunha lexislación, o Decreto 247/95, que -despois de 12 anos de aplicación- tiña demostrado que non estaba respondendo aos obxectivos para os que fora deseñada, tal como poñen de manifesto os últimos datos do Mapa Sociolingüístico de Galicia.

3. Persegue como finalidade última que o alumnado acade, ao rematar os seus estudos, unha plena competencia lingüística que o capacite para expresarse oralmente e por escrito nas dúas linguas oficiais de Galicia, no marco dun ensino plurilingüe.

4. Favorece que cada centro elabore o seu propio Proxecto lingüístico, documento que debe ser aprobado polo Consello Escolar e que, polo tanto, require a implicación e o consenso de toda a comunidade educativa: profesorado, alumnado, pais/nais, persoal non docente e representantes dos concellos.

Dado que consideramos as medidas que se establecen no decreto como unha achega importante na tarefa dinamizadora e normalizadora que realizamos nos centros e que non pasou tempo suficiente para avaliar se os seus resultados satisfán os obxectivos para os que foi aprobado, solicitámoslle ao novo goberno que manteña os compromisos acordados pola comunidade educativa e o Parlamento galego no Plan xeral de normalización da lingua galega.

Na ligazón seguinte podedes ver todolos centros que se sumarón ao manifesto
http://www.coordinadoraendl.org/

Cine galego na TVG

2009-03-27T08:50:00.000Z

a produtora VÍA LÁCTEA FILMES comprácese en anunciarvos a emisión na TVG da súa última longametraxe

PRADOLONGO NA TELEVISIÓN O DÍA 31 DE MARZO

O día 31 de Marzo ás 22:00 horas emitirase na TVG o filme PRADOLONGO.

Non deixes escapar a oportunidade de ver a longametraxe máis vista do cine galego.

Unha película que nos fala da nosa forma de ser, de vivir, de namorarnos, de medrar.

Un filme recoñecido máis alá das nosas fronteiras, e protagonizado por RUBÉN RIÓS,TAMARA CANOSA E ROBERTO PORTO.

PRADOLONGO LEVOU AO CINE A TODAS AS XERACIÓNS, NAMORANDO A NENOS, ADOLESCENTES E MAIORES. DESCÓBREA!

-Premio Cidade de San Sebastián. 56ª edición FESTIVAL DE SAN SEBASTIÁN.

- Premio especial 13ª edición FESTIVAL DE CINE INTERNACIONAL DE OURENSE.

-Premio Jerry Goldsmith. Mellor banda sonora e mellor compositora novel.

- Premio Medalla de ouro Park City Film Music Festival. Park City, Estado de Utah ao sudoeste dos Estados Unidos.

REGUEIFEIROS NO ILLA DE ONS

2009-03-23T20:48:00.006Z

Outro día máis tivemos connosco a Pinto de Herbón e máis o Caruncho,para facer unha selección de rapaces e rapazas que van participar no concurso provincial de regueifas en Pontevedra o día 17 de abril.O mércores 18 de marzo despois dunha sesión maxistral a cargo distes regueifeiros, escolléronse os seguintes alumnos/as:
.LUIS MARTÍNEZ GALLEGO
.ESTRELLA PÉREZ PORTO
.PEDRO NOVAS OTERO
.JOSUHA ACUÑA MARTÍNEZ
.IRENE CABANELAS MEIRA
.AGUSTÍN GALLEGO PIÑEIRO
.IDOIA CANCELAS LEÓN
.MAURO ÁLVAREZ MARTÍNEZ
.PATRICIA COMEDEIRO ALFAYA
.ELSA DUARTE SIMOES

Tamén queremos informarvos que o próximo día 31, volveran Pinto de Herbón e máis o Caruncho a facer dúas sesións ós alumnos/as de 4º da ESO e 2º A, e os cursos de1º da ESO .

FALAR E ESCOITAR EN GALEGO

2009-03-06T08:03:00.005Z

O venres 27 de febreiro 5 rapaces e rapazas do IES illa de Ons que forman parte do taller de oralidade, estiveron no CEIP a Pedra de Bueu,onde lle contaron os nenos/as de 1º de primaria catro contos.
" A TOUPIÑA ", contado polas rapazas de 4º da ESO, Yolanda e Seila.
" GAROTO EN BUSCA DUNHA ESTRELA" que o contaron Iria e María de 2º da ESO.
" AMORA" e " GÚSTAME O CHOCOLATE" que o contou Miguel Ángel de 2º da ESO.
Desde aquí dámoslle as grazas ,pola súa actitude e traballo desinteresado a prol da lectura, e desexamos que continúen facendo actividades tan gratificantes e interesantes en torno ós libros.

Actividades do Equipo de Normalización e Dinamización Lingüística do IES Illa de Ons

2008-12-04T09:56:00.003Z

Bueu, 4 de decembro de 2008.

eNDL.

Equipo de Normalización e Dinamización Lingüística do IES Illa de Ons.

O Equipo de Normalización e Dinamización Lingüística do IES Illa de Ons (eNDL) desenvolve a tarefa de potenciar o emprego da lingua galega neste Centro, tanto na fala como na escrita, en cumprimento da lexislación vixente.

Ao longo do presente curso 2008-2009 o ENDL ten previsto desenvolver as seguintes actividades:

Publicación de un ou dous novos números da revista Umbrela (publicáronse 11 números nos últimos anos, dos cales algúns foron dixitalizados e publicados no blog).

Contacontos: Un obradoiro de comunicación oral consistente en aprender a contar un conto, recrealo e logo facelo para alumnas e alumnos de primaria do colexio A Pedra de Bueu.

Regueifeiros: Un obradoiro dirixido por dous recoñecidos regueifeiros (Pinto D`Herbón e O Caruncho) que xa estiveron no centro en novembro nunha actividade dirixida a alumnas e alumnos de 2º e 3º, explicando a súa técnica e facendo demostracións da mesma. En febreiro celebrarase a segunda parte da actividade na que os regueifeiros se centrarán naquelas alumnas e alumnos seleccionadas/os pola calidade das súas regueifas, de xeito que podan participar nun concurso galego de regueifeiros.

Club de lectura. En todo o mundo aparecen constantemente novos clubs de lectura, que consisten en grupos de persoas que se reúnen periodicamente para comentar un libro que previamente tiñan escollido. No noso centro tratamos de crear un club para 1º e 2º e outro para 3º e 4º, que se reunirán nun recreo semanal ou quincenal.

Dous concursos literarios: un de cartas de amor e desmor por volta do día 14 de febreiro e outro de contos e poesía por volta do 17 de maio. 10.

Noticias sobre a normalización lingüística: Nos taboleiros que se encontran no vestíbulo do Centro difundiremos referidas a diferentes ámbitos: o mesmo Centro Escolar, o Concello de Bueu, o Morrazo, Galiza,... indicando tamén sitios e páxinas de Internet en galego e iniciativas privadas e públicas que coñezan os alumnos.

Blogs e páxinas asociadas: Durante o curso 2007-08 creáronse desde o eNDL e en relación coa Biblioteca varios no IES Illa de Ons. Estes lugares están á disposición de todas as persoas que integran a comunidade educativa: alumnas e alumnos, pais e nais, persoal de administración e servizos, profesores e mesmo para calquera persoa que queira acceder a eles (xa fomos visitados nas nosas páxinas por alumnos doutras centros educativos de Galicia).

Para facilitar o acceso a estes lugares e os seus contidos, explicamos brevemente como chegar e o que encontraremos neles:

http://bibliotecailladeons.blogspot.com/

Como indica o seu nome, este é o blog da biblioteca. Nel encontraremos entre outros contidos, comentarios de alumnos e alumnas sobre os seus libros de lectura no centro.

Inclúense ligazóns a:

- Páxina web do IES Illa de Ons.

- Bibliotecas do concello de Bueu.

- Bibliotecas virtuais.

- Blogs doutros centros escolares galegos.

http://endl-illadeons.blogspot.com/

Equipo de Normalización e Dinamización Lingüística. Inclúe contidos relacionados coa normalización da lingua, así como referencia ás actividades que se están desenvolvendo ou que se desenvolveron no IES en relación con esta cuestión.

Inclúense ligazóns a:

- A Mesa Pola Normalización Lingüística.

- Editoriais.

- Dicionarios.

- Xornais dixitais: Vieiros, Galicia Hoxe, A Nosa Terra (semanario).

- Tradutores: galego-castelán-inglés-francés…

- Memorias de Adán: historias contadas por Adán sobre a súa familia, o mar e a Illa de Ons.

- Club dos Poetas Vivos: poemas dun grupo de alumnos e alumnas que iniciaron este proxecto cando estudaban 3º de ESO (Estrella, Yoel, Tamara, Agustín).

- Diarios de Adriana e Jacky: unha novela escrita por Mónica e Elisa cando estudaban 4º de ESO.

http://revistailladeons.blogspot.com/

Revista Umbrela. É a revista do IES Illa de Ons, editada polo ENDL, contén números da revista desde que se iniciou a súa publicación (nº 1, 2, 3, 5, 7, 9, 10, 11).

Inclúe ligazóns, ademais de aos outros blogs, a:

- Memoria de Adán.

- Club dos Poetas Vivos.

- Diarios de Adriana e Jacky.

2008-12-01T22:33:00.004Z

O Equipo de Normalización Lingüística organizou esta actividade de regueifas, ofertada pola Consellería de Cultura da Xunta de Galicia.
Contamos coa presenza cautivadora de Pinto de Herbón e Luis o Caruncho, que nos fixeron pasar uns intres divertidos. Grazas os dous polo ben que o facedes.

Ninguén vai pensar que é certo
e ides flipar en cores
tivemos dous regueifeiros,
son sen dúbida os mellores.

Regueifar é cousa fácil
cando os nosos mestres son
Luisiño o Caruncho
E máis o Pinto de Herbón.

Aí vos vai por despedida
aí vos vai por derradeira
unha clase divertida
de como facer regueifas. (Xavier)

Lamatumbá e o seu paraugas universal

2008-11-30T22:52:00.002Z

FORO LETRAS VIVAS

2008-11-28T12:24:00.005Z

Programa
Inscrición
Forma de inscrición: a través do formulario da xornada
no sitio web: www.culturgal.com
Prazo: até o 2 de decembro
Límite de prazas: 100 persoas, por orde de inscrición.
OBXECTIVOS
· Potenciación do programa Letras Vivas.
· Apertura dun espazo para o coñecemento das distintas
propostas que hai no programa.
· Achegamento das propostas ao público especializado.
· Fomento do intercambio de experiencias

Día e lugar
Sábado 6 de Decembro
No marco de Cultur.gal 08, en Palexco
(Peirao de Transatlánticos s/n. A Coruña)
10:30h. Recepción
11:00h. Apertura do foro por parte do director xeral de Creación
e Difusión Cultural, Luís Bará, e explicación-presentación do
programa Letras Vivas.
11:30h. - 13:30h. Presentación de propostas e contacto entre
programadores/as e entidades.
Altega. Xestión do lecer
Bugalú. Contacontos, espectáculos musicais...
Reverso. Comunicación, cultura e lingua
Argallando. Educación e lecer
Duende Sico. Teatro, monicreques, obradoiros...
A Locamotora. Teatro
María Inés Cuadrado. Comunicación, expresión oral...
Seisdedos / Viravolta. Monicrecres, animación, obradoiros...
Migallas Teatro. Teatro, discos, obradoiros...
13:30h. Remate do foro

SÁBADO 6/12/08
CREADOR/A
Estíbaliz Espinosa
Migallas Teatro
Yolanda Castaño
HORA
21:30h.
16.30h.
21.30h.
ACTIVIDADE
Participación dentro do espectáculo Music.gal.
Cantacontos.
Participación dentro do espectáculo Music.gal.
DOMINGO 7/12/08
CREADOR/A
Anxo Angueira
HORA
17:00h.
ACTIVIDADE
Pola poesía, recital musicado acompañado
por Leo Arremecághona.

HOXE 17 DE NOVEMBRO: TOCA MAGOSTO

2008-11-17T11:16:00.002Z

Con música e castañas asadas faremos a festa pola tarde no IES illa de ONS

EXPRESIÓNS COA PALABRA CASTAÑA:

Sacarlle as castañas do lume: librar a un dun problema.

Darlle unha castaña: zurrarlle na cara.

¡Toma castaña!:levar un chasco.

¡Pegarse un castañazo!Pegarse un golpe forte.

CLASES DE CASTAÑAS:
Abadá, agrela, branquiña, bicuda, brava, buxeira, cabezuda, chatadesa, galeza, garrida,leinova, lemos, loura, luguesa, mansa, martesa, pagaíña, picón, rañuda, riá, ribeira,verdella, vermella, senra.

REFRÁNS:
Con castañas asadas e sardiñas salgadas non hai ruín viño.

A castaña e o besugo, no febreiro non ten zugo.

As castañas no Nadal, saben ben e pártense mal.

Temperá é a castaña que no setembro regaña.

A castaña no agosto quere arder, e no setembro beber.

A castaña que está no camiño é do veciño.

A LITERATURA GALEGA RECIBE PREMIOS

2008-10-28T19:59:00.002Z

Agustín Fernández Paz, Premio Nacional
de Literatura Infantil e Xuvenil

23 de outubro de 2008

A obra galardoada é O único que queda é o amor

Agustín Fernández Paz foi galardoado co Premio Nacional de Literatura Infantil e Xuvenil correspondente a 2008 pola súa obra O único que queda é o amor, editada por Xerais. O Premio concédeo o Ministerio de Cultura para distinguir unha obra escrita en calquera das linguas oficiais do Estado.

Biografía
Agustín Fernández Paz (Vilalba, Lugo. 1947), profesor de Lingua e Literatura no Instituto dos Rosais de Vigo, pertence aos colectivos de renovación pedagóxica Avantar e Nova escola Galega. Impartiu numerosos cursos sobre temas relacionados coa didáctica da lingua e coa normalización lingüística.

Obtivo, entre outros, o premio Merlín de literatura infantil en galego, o Lazarillo, Edebé de Literatura Xuvenil e o Premio da Asociación de Escritores en Lingua Galega.

Entre a súa numerosa produción literaria cabe citar Cartas de inverno, Amor dos quince anos, Un tren cargado de misterios, No corazón do bosque, Corredores de sombra, Contos por palabras, Rapazas, Trece anos de Branca e O raio veloz. A súa obra foi traducida ao castelán, catalán, éuscaro e portugués.

GALEGUIZA COMO TE CHAMAS!!!

2008-10-20T23:23:00.002+01:00

Na Universidade de Vigo, os da Facultade de filoloxía acaban de sacar esta páxina http://www.chamateconxeito.com/ na que podedes consultar sobre o voso nome e os vosos apelidos.
Se alguén está interesado en facer algún cambio, ou de onde ven o seu nome e apelidos, ten aí as ferramentas e a información para facelo.

GALEGUIZA A TELEFONÍA MÓVIL

2008-10-01T23:19:00.001+01:00

Telefonía

Terminal Grundig 402i

SOLICITA E ESIXE SERVIZOS DE CALIDADE A ESTAS COMPAÑÍAS:

CHAMA:

Calquera compañía telefónica ofrece aos seus clientes con contrato a posibilidade de emitir as facturas en galego. Solicita ese servizo. A chamada é gratuíta.
Vodafone ten un servizo de atención ao cliente en galego das 8 h ás 24 h. Solicítao chamando gratuitamente a 123. Esixe tamén a atención en galego as 24 horas do día. Nestes momentos non hai opción de atención en galego para os contratos de empresas.
Movistar ofrece só para os clientes con cartón prepagamento a activación de todos os servizos en galego. Chama ao 220 e actívao. Os clientes de contrato non dispoñen de atención en galego; deixa a túa queixa no 609. Unha vez estabelezas contacto co teu interlocutor, pide que che pasen co 'coordinador', que é quen realmente debe receber as queixas. A chamada é de balde. Outra opción é chamar ao Centro de relación co cliente, é o 109 desde o telemóbel ou o 1486 desde o fixo. Tamén podes deixar a túa queixa a través de internet na seguinte web.
Amena non dispón de servizo de atención ao cliente nin mensaxería en galego, deixa a túa queixa, sen custe ningún, no 470 se chamas desde un móbil Amena, ou no 656 00 14 70 se chamas desde outro teléfono. Si que é posíbel activar o teu correo de voz en galego, así que non deixes de facelo.

ENVÍA:

cartas ás compañías de telefonía móbil solicitándolles a utilización do galego con normalidade:

Orange *
Parque Empresarial La Finca
Paseo del Club Deportivo nº1, Edificio 8, 28223 Pozuelo de Alarcón (Madrid)

Telefónica - Móviles *
Pza. Independencia, 6
28001 Madrid

Vodafone *
Avda. de Europa, 1 (Central)
Parque Empresarial La Moraleja - Alcobendas
28108 Madrid

(* Modelos de carta actualizados dispoñíbeis en breve.)
cartas aos fabricantes de teléfonos solicitando a inclusión do idioma galego entre as opcións das terminais. Podes descargar aquí as cartas modelo e aquí os enderezos a onde mandalas.
carta de parabéns a Alcatel por ser a primeira compañía que ofreceu o galego en todos os seus telemóbeis.
carta de parabéns a Movistar por incluir o galego no terminal Grundig 402i.

RECOLLIDO DA MESA POLA NORMALIZACIÓN LINGÜÍSTICA

VIDEO EXPLICATIVO DO QUE É "PONTE NAS ONDAS"

2008-06-12T09:25:00.000+01:00

COMO SE FIXO "PONTE DO MEU LADO"

2008-06-12T09:21:00.001+01:00

NOVA ENTREGA DE POEMAS

2008-06-11T23:57:00.004+01:00

Club dos Poetas Vivos. Nova entrega de poemas, algúns deles aínda non publicados na rede.

Tamara García Piñeiro

Amor,

xúrame,

que non te irás.

Non me deixes soa.

Ninguén nos dividirá.

Sexamos un.

Estreya

Por que choras, se te quero?

Non o sei,teño medo

Xa non sei se te amo

É un pesadelo.

Agustín Gallego

Consolarte,

escusa para verte mais preto.

Aloumiñarte,

tocar unha nube.

Preme nesta ligazón para ver as creacións do Club dos Poetas Vivos
http://bibliotecailladeons.googlepages.com/home

RUXE-RUXE

2008-05-22T00:49:00.002+01:00

"Xigantes" (PAI-Música 2008) é o novo traballo discográfico dun dos grupos de rock máis importantes do actual panorama musical galego: Ruxe-Ruxe. Un disco que ten un coidadoso equilibrio contemporáneo, compacto e cheo de enerxía e entusiasmo no que a banda de Aríns amosan a madurez acadada ao longo destes anos.

2008-05-20T23:40:00.000+01:00

EN DEFENSA DO GALEGO

2008-05-20T08:57:00.005+01:00

O domingo 18 de maio polas rúas de Santiago, milleiros de galegos e galegas de tódalas idades reclamamos o dereito coma galegos a usarmos o noso idioma nas nosas relacións coa administración, nos centros de traballo, na nosa vida diaria... en Galicia.

MEMORIA DE ADÁN

2008-05-20T08:37:00.001+01:00

Memoria de Adán. Así se titula o conxunto de escritos que desde xaneiro de 2008 está elaborando Adán L. Domínguez Falcón, alumno de 4ºB. Nos seus escritos Adán retrata cunha memoria extraordinaria e unha gran precisión nos detalles unha historia familiar real –a da súa familia- que se vincula a dous eixos: o mar e a illa de Ons. Seguindo o que Adán escribe descubrimos un mundo ao tempo próximo e afastado: historias de pesca, naufraxios, a vida cotiá na Illa, a morte dunha vaca,… e sen dúbida un mundo integrado no tempo e na natureza do cal temos moito que aprender, un mundo comunitario e solidario, no que axudar ao outro é o natural.
A grande riqueza lingüística, tanto pola expresividade como polo vocabulario mariñeiro, son un valor fundamental nesta obra.
Encontramos Memoria de Adán nunha Googlepage á que se pode chegar seguindo unha ligazón que se encontra no blog do Equipo de Normalización e Dinamización Lingüística ou no da Biblioteca.

REVISTA UMBRELA NÚMERO 10

2008-05-14T12:55:00.002+01:00

Estamos en Internet. Podes encontrar os números atrasados de Umbrela visitando o blog do Equipo de Normalización e Dinamización Lingüística ou ben o da Biblioteca do IES Illa de Ons. Para chegar a esta revista encóntrase unha ligazón na parte dereita que leva directamente a unha Googlepage onde podes ler Umbrela 10.

LORETTA MARTIN:

DIARIOS DE ADRIANA E JACKY

2008-05-14T12:31:00.002+01:00

Diarios de Adriana e Jacky. Este é o título dunha novela que comezou a escribirse no IES Illa de Ons en febreiro do 2008. Tamén aquí falamos dun colectivo literario, que se chama Doussabores, e está constituído por Mónica Rodríguez e Mª Elisa Dios, de 4ºB. O que parecía unha ocorrencia da xuventude, e que podía ter rematado no capítulo I, encóntrase xa, cando escribimos esta presentación, no capítulo XVII, o cal en si mesmo é un mérito. Tamén é un mérito que sexa interesante, como din algúns dos que a comezaron a ler. A temática é a que se recolle nos diarios persoais das dúas protagonistas, que estudan nun instituto de Vigo 4º de ESO. Elas falan de amor, da amizade, de drogas, de anorexia,… en fin, da realidade que viven a diario. Cada unha fala coa súa voz, sen compartir a información coa outra.

Encontramos os Diarios de Adriana e Jacky nunha Googlepage á que se pode chegar seguindo unha ligazón que se encontra no blog do Equipo de Normalización e Dinamización Lingüística ou no da Biblioteca.

17 de MAIO LETRAS GALEGAS 2008

2008-05-13T23:58:00.001+01:00

XOSÉ MARÍA

ÁLVAREZ BLÁZQUEZ

ESCOLMA DE PÁXINAS WEB E SITIOS DA REDE SOBRE O ESCRITOR,PARA O SEU USO EDUCATIVO.

EQUIPO DE NORMALIZACIÓN E DINAMIZACIÓN LINGÜÍSTICA DO C.E.I.P. QUINTELA (MOAÑA)

REAL ACADEMIA GALEGA

A páxina da Real Academia Galega dedicada ao escritor. O texto é de Darío Xohán Cabana,e fai referencia á biografía,obra literaria,ó erudito galeguista,ó editor,e reúne a súa bibliografía esencial.Contén fotos e imaxes.

PORTAL DO DÍA DAS LETRAS GALEGAS

O Portal do día das letras galegas,con referencias biográficas e información de todos os homenaxeados.

PÁXINA DE GALIPEDIA SOBRE ÁLVAREZ BLÁZQUEZ

A Páxina da Galipedia sobre Álvarez Blázquez,con biografía,e bibliografía do autor estruturada según o xénero.Recolle tamén os premios outorgados e ligazóns a outras páxinas.

CULTURA GALEGA

Publica a noticia da elección do escritor como homenaxeado nas LG 2008,e explica de xeito breve os seus méritos.

PAXINA WEB DE CELS0 ÁLVAREZ CÁCCAMO

Unha páxina moi completa,por ampla,profunda e precisa.Fermosa reportaxe fotográfica,reúne moreas de materiais ,desde documentos sonoros a citas xornalísticas .Feita desde o respecto e admiración dun fillo.

BIBLIOTECA VIRTUAL GALEGA

A páxina da Biblioteca Virtual Galega sobre o autor,con todos os seus libros e outras informacións.

PRAZA DAS LETRAS-ALVAREZ BLÁZQUEZ

Contén pequena recensión biográfica e as portadas dalgúns libros .

SEMINARIO GALÁN

Esta páxina ten unha biografía e a súa obra, recollidas de xeito moi didáctico.

MANIFESTO DA MESA POLA NORMALIZACIÓN LINGÜÍSTICA

2008-05-13T18:51:00.001+01:00

Manifesto: POLO DEREITO A VIVIRMOS EN GALEGO

As persoas e entidades que apoiamos a manifestación nacional “Polo dereito a vivirmos en galego” este 18 de maio de 2008, declaramos:

Consideramos que vivir en galego é un dereito inalienábel das persoas na Galiza, e un dos dereitos humanos elementais que temos como pobo. Lembramos que o galego é o único idioma natural de Galiza, e que mesmo o Estatuto de Autonomía o cualifica como “a lingua propia” do país, o que nos une como galegas e como galegos. O pobo galego ten dereito a que a súa lingua ocupe todos os ámbitos da vida social propios de calquera idioma, con dignidade e con normalidade.
Consecuentemente, deben existir as garantías para podermos vivir en galego, o que exixe compromisos, así como a aplicación e a adopción das disposicións legais necesarias por parte das Administracións públicas.
Denunciamos e alertamos contra os que, apuntándose agora á defensa dun suposto bilingüismo, un bilingüismo dunha soa cara, pretenden unicamente o mantemento da diglosia e a desaparición do galego. Ou, o que é o mesmo, a negación do dereito colectivo á normalidade de usos da nosa lingua en todos os ámbitos.
Chamamos ao compromiso persoal de todas e todos coa lingua galega. Usémola en todos os ámbitos: comezando pola familia, coas nosas nenas e nenos, no noso traballo, nas relacións coa administración, no noso tempo de lecer, etc. O futuro do galego depende de nós.

Lembra que o vindeiro domingo 18 de maio esta grande manifestación partirá ás 12 do mediodía da Alameda de Santiago de Compostela e finalizará na praza da Quintana.

APOIOS Ó MANIFESTO:

Concello da Coruña

Concello de Allariz

Concello de Ames

Concello de Arzúa

Concello de Cuntis

Concello de Fene

Concello de Ferrol

Concello de Gondomar

Concello de Melide

Concello de Mugardos

Concello de Muros

Concello de Noia

Concello de Ordes

Concello de Ourense

Concello de Outes

Concello de Pontevedra

Concello de Redondela

Concello de Rianxo

Concello de Ribadeo

Concello de Riotorto

Concello de Salceda de Caselas

Concello de Santiago de Compostela

Concello de Vedra

Concello de Vigo

Concello de Zas

Concello de Porriño
- Departamento de Francés do CIFP Carlos Oroza
- Departamento de Lingua e Literatura do IES de Viós (Abegondo)
- Departamento de Lingua e Literatura do IES Pobra do Caramiñal
- Departamento de Lingua e Literatura Galega do IES Coroso (Ribeira)
- Departamento de Lingua Galega do IES Nº 1 de Ordes
- Departamento de Lingua Galega e Literatura do CIFP Carlos Oroza
- Departamento de Lingua Galega e Literatura do CPI Alcalde Xosé Pichel (Coristanc0)

2008-04-08T11:54:00.001+01:00

O Club dos Poetas Vivos.

O Club dos Poetas Vivos surxiu entre un grupo de alumnas e alumnos de 3º de ESO do IES Illa de Ons de Bueu no outono do ano 2007. Cada un dos integrantes tiña escrito poemas e un día crearon un colectivo (“Ti/o meu universo…”). A partir de aquí presentouse a posibilidade de actuaren como un colectivo poético, polo que buscaron un nome e unha imaxe que os identificase. A imaxe é unha rosa que nos remite aos antigos tópicos literarios sobre vivir o momento presente (“Colligere virgo rosas”: coller as rosas no seu esplendor), e o mesmo acontece co nome Club dos Poetas Vivos, parafraseando o título do filme que trata dun grupo de alumnos poetas nun colexio de disciplina inglesa.

Os integrantes deste colectivo de poetas son Agustín Gallego Piñeiro, Estrella Pérez Porto, Tamara García Piñeiro e Yoel Parada Santos, todos eles estudantes no curso de 3ºB.

TAMARA GARCÍA PIÑEIRO

2008-04-08T09:33:00.001+01:00

O CLUB DOS POETAS VIVOS.

Estráñote tanto...

Estraño os teus beizos.

Son os teus bicos.

Estraño os teus ollos.

Son o teu

o teu desexo.

Estraño a túa pel.

Esperta

a miña paixón.

Estraño as túas palabras

que me din

que me queres.

Estraño o teu cheiro

que me

enche de vida.

Estráñote tanto...

Tamara García Piñeiro

Ti,

todo para min.

Luz

que alumea a miña vida

como unha estrela

con quen soño

todas as noites.

E agardo

por terte

nos meus brazos.

que enches cada oco do meu corazón

que me dis

que me queres

que sen min

perdes a razón.

O único

a quen eu amo.

o centro da miña vida:

douche as grazas

por quererme así

por amarme

sen medios

e facerme feliz.

Tamara García Piñeiro

YOEL PARADA SANTOS

2008-04-08T09:19:00.002+01:00

O CLUB DOS POETAS VIVOS.

Yoel Parada Santos

1ª

Ela, miña amada

ela

a miña luz, a razón pola que soño

Daríao todo por ela,

daría a miña vida,

as miñas crenzas.

Con ela síntome vivo, alegre,

con ganas de que non acabe o día para poder estar ao seu lado,

sen ela

só

estou a cavilar en cando a volverei a ver.

O seu cabelo é o sol,

Pérdome nas ondas do mar do seu corpo.

Ou simplemente, pódese dicir que a amo,

ata o punto de que faría o imposible por vela sorrir.

Yoel PARADA SANTOS

2ª

Que teu sorriso alégrame a vida.

Que un día sen ti non é vida.

Que as miñas bágoas levan o teu nome escrito.

Que a túa mirada é beleza.

Que os teus beizos son esperanza.

Que terte cerca é sentirse vivo e que non terte non ten sentido.

E que se o amor ten un destino…o teu corazón é o meu….

Que saibas amor,

que me mata máis a túa dor

que a miña propia morte

Yoel Parada Santos

3ª

Pode ser que non che fale, pero escoitote

e aínda que non te vexa, síntote

e en soños bícote,

e non sei o que sinto.

Fasme soñar

e loito por non chorar.

Yoel Parada Santos

4ª

Cando me falas, fasme sorrir

Por ti levántome todolos días

Es a miña únca razon da miña vida

Es a causa de todo o meu existir.

Se ti non existises, morreria

Polo teu amor esperando seguirei

Ou por unha mirada deses luceiros

que me elevan até o ceo e

sen estar entre os mortos

Yoel Parada Santos

5ª

Primeiro foi miña amiga.

Cheguei a querela, e por sorte,

puidemos estar xuntos.

Pero eu,

tan tonto, tan celoso e tan cabezota, iaa perdendo pouco a pouco.

Até que un día,

cansou de min e

deixoume.

Nese momento deime conta

do moito que a quería,

moito máis do que pensaba

e de que daría a vida por ela

Pedinlle volver ao meu lado

e non quixo,

púxenme no borde da ventá,

e coma unha aguia pola súa presa,

tireime en picado.

Yoel Parada Santos

6ª

NUNCA TE ESQUECEREI

Á miña bisavoa Margarita, que faleceu o 30 de xaneiro de 2008.

Xa marchaches.

Non te voltarei mirar.

É unha viaxe para

Sempre.

Recordo

aqueles tempos,

cando era cativo:

dábasme

unha moeda

e xa era feliz.

Xamais esquecerei

como me ilusionabas

cun simple xoguete.

Xa non estás

e o que antes

non era nada

agora son

recordos

que se cravan

no meu corazón.

Tantas cousas

no aire!

Palabras

sen dicir,

momentos que

non pasamos

xuntos.

Un simple

quérote

demostraríache

o que te botaría de menos.

Como non cho dixen cando vivías,

digocho neste verso:

Quérote bisavoa!.

Yoel Parada Santos

7ª

Naquela tarde fría e húmida de maio faleiche. Ao instante namoreime

Comezamos a falar, funte coñecendo.

Ao cabo do tempo enchiches o meu corazón de amor

Non te podo mirar, nin sequera me deixas falar.

E o meu corazón rompeu a

chorar por ti

Explícame,

porque teño que vivir sen ti?.

Yoel Parada Santos

8ª

Eu quérote.

Ti non me cres.

e xa non sei que facer.

Daríache a vida se ma pediras.

Marchas e non sei que será de min.

Só teño a dúbida de se me esquencerás.

Eu non poderei.

Yoel Parada Santos

9ª

Unha lágrima túa,

é unha puñalada no meu peito.

Un sorriso da túa face,

é unha luz celestial.

Unha mirada dos teus ollos

é esperanza de vida.

Un bico dos teus beizos perfectos,

dáme ás

para voar

e chegar até o altar do ceo.

Yoel Parada Santos

10ª

Ti,minha senhor,

aquí no alto do meu corazón

estás tan lonxe que non logro verte.

Non me atrevo a dirixirme a ti.

Ao final díxencho,

e por fin saín de dúbidas,

e por fin me dou conta de que si,

que sentes o mesmo ca min.

Sinto morriña de estar as noites ao teu lado,

bicando o teu pescozo.

Xa non me fas caso.

Se vas seguir sen tan sequera mirarme,

prefiro que Deus me quite a vida.

Ai,minha señor,

se xa non me deixas bicarte,

sen o teu amor,

morro.

Agustín e Yoel 1ª

o meu universo,

a miña vida.

A distancia

unha barreira

imposible.

O amor,

a luz que ilumina

a miña noite,

e a ti,

a carón da lúa.

A túa mirada

indiferente

deixa maltreito o meu corazón.

Os teus ollos,

engaiólanme:

dúas estrelas,

na noite de verán

ESTRELLA PÉREZ PORTO

2008-04-08T09:05:00.002+01:00

O CLUB DOS POETAS VIVOS.

O meu amor por ti non o troco, ti a min trocaríasme?

Pasearía polos teus brazos,

Reflectiríame nos teus ollos,

Perfumaríame no teu cabelo,

e nos teus beizos

acocharíame.

Eu por ti morrería, ti por min morrerías?

Daría a miña vida,

Perdería o meu sangue,

Por ti non sei o que daría.

Estrella Pérez Porto

Cada noite

mirando as estrelas do ceo

pídolle a deus

que se algún día

os teus beizos non bico

me saque a vida.

Véxote

en cada esquina

da miña casa.

Os teus ollos perséguenme.

Non sei

se me queres

pero

a miña alma

e o meu corazón

perténcenche.

Fai con eles

o que queiras.

Estrella Pérez Porto

AGUSTIN GALLEGO PIÑEIRO

2008-04-08T08:50:00.001+01:00

O CLUB DOS POETAS VIVOS.

POEMA 1

Agustín Gallego Piñeiro

Quérote,

ámote,

pero estás tan lonxe.

Lonxe: esa palabra que define

o teu amor cara a min,

afastada,

palabra maldita

á que tanto rancor teño.

Aínda que sei

que algún día

te fixarás en min

e logo engaiolareite

como poida.

Aínda que un furacán

me leve por diante,

eu seguirei tentando engaiolarte

e se non resulta

logo,

quizais,

dareime por vencido.

POEMA 2

Agustín Gallego Piñeiro

Como remediar o teu mal,

que me come por dentro,

trábame no corazón

e déixao tan mal ferido

como se combatese nunha loita encarnizada

polo poder dun amor imposible?.

Ti,

loita que sempre perdes

pola súa fraxilidade ao teu amor,

non o pode remediar.

É máis forte ca el

pero sempre cae

na mesma trampa

parecendo que nunca aprende

e as feridas non lle doen.

Pobre del!

Non sabe curar as súas feridas.

Poema 3

Agustín Gallego Piñeiro

Felicidade

reflectida nun sorriso.

Tristeza:

noticias que se escitan

diariamente, rutinariamente,excesivamente,

tristemente...

As persoas.

Seres con emocións

que moitas veces

quererían desaparecer.

O MAL,

asasino,

mal da cabeza,

que tantas vidas…

que tantas vidas leva.

CARTA I

Ao meu durmir

Agustín Gallego Piñeiro

Espertarás?

Non o sei.

Intentaralo?

Dubídoo.

Soñarala?

Seguro que si.

Como será?

Tento maxinar,

pero…

tento.

Non podo

ata que esperto.

Imaxino.

Beleza pulida,

intelixencia esteparia…

non é ela .

Tento outra vez.

Imaxino.

beleza interior,

ollo a súa fermosura…

é ela.

Ulo o defecto?

Rozar os seus beizos,

oír a súa pel,

tocar as súas mans,

bicala,

demostrarlle amor.

CARTA II

AMIGO INVISIBLE

Agustín Gallego Piñeiro

Que contarche?

Que farías?

Cavilando

cheguei á conclusión:

esquecela.

Ti que dis?

Como farei?

Éme imposible.

Xa o sabes:

soño con ela,

non podo parar…

parar de vela.

Como farei?

Dígollo…non

non, podo…

SI! Claro que sí

vou botarlle

coll…todas,

todas as miñas gañas,

claro que si,

grazas meu,

es un amigo.

CARTA III: CARTA AO MEU AMOR

Agustín Gallego Piñeiro

Querido amor…

non, perdón:

querida amiga.

Como chamarte?

Cando acabe,

sabereino.

Quérote, ámote,

adórote, deséxote.

Sabes o que digo, non?

Non podo durmir

só penso en ti.

Estou raro.

É o que ten.

Estou namorado,

namoradode ti.

Ti sentes o mesmo?

Soño con terte,

terte entre os meus brazos,

tocar os teus beizos,

poderte ver co teu querer…

Ti…

ti pensas o mesmo?

espero que si,

se non,

penso que fixen o ridículo.

Non!Non!

que digo,

diso nada,

dixen…

dixen o que quería

comíame por dentro

non me queres?

Morrerei.

Non me importa

Seguirei coa miña vida.

Peroooooooooooooo

Cun oco,

Oco no meu corazón.

CARTA IV

RESPOSTA DO MEU GRAN AMOR

Agustín Gallego Piñeiro

Querido,

como contestarche?

empezarei por isto:

Qué- ro- te!!!!

Quérote moito!!!!

Pensas…

pensas que non te amo?

Non era capaz de dicircho.

Pensei…

pensei que non che gustaba

pero agora

seino,

seino e alégrome.

Quero pasar cotigo

todos os días:

bicarte

tocar o teu cabelo.

Penso

e non chega o momento

de estarmos xuntos.

Mañá mirareite

bicareite

e non soltarei a túa man.

Aguantaremos até mañá?

Dubídoo.

Pero intentémolo.

PARA RELAXARSE UN POUCO!!!

2008-04-01T11:55:00.004+01:00

2008-01-30T08:46:00.000Z

MOCIDADE.- A Mocidade pola Normalización Lingüística e o Colectivo de Nais e Pais polo Ensino en Galego denuncian a supresión do Xabarín Clube no horario semanal de tarde da TVG
[29/01/2008]

Ambas as seccións da Mesa considérana “un grave retroceso” e lembran que un dos obxectivos básicos da televisión pública galega é “ser ferramenta activa” no proceso de normalización da lingua

A Mocidade pola Normalización Lingüística e o Colectivo de Nais e Pais polo Ensino en Galego, seccións da Mesa pola Normalización Lingüística, veñen de denunciar a nova modificación no horario de tarde da TVG que, como xa acontecera no pasado, deixa fóra o Xabarín Clube, o espazo televisivo infantil da canle pública por excelencia. Co novo cambio na programación, o programa liderado polo máis popular porco bravo de todos os tempos fica relegado aos sábados pola mañá e máis a un reducido oco na primeira hora da mañá pola semana de, aproximadamente, unha hora de duración.

Os colectivos pertencentes á Mesa consideran a decisión da canle pública de televisión un “grave retroceso” ao tempo que anuncian que “instarán” de xeito inmediato a dirección da TVG a reconsiderar a exclusión do Xabarín Clube do horario semanal das tardes. Tanto a sección xuvenil da asociación en defensa do idioma como o Colectivo de Nais e Pais sinalan que o espazo infantil é, desde os seus comezos, “unha ferramenta privilexiada” para a promoción da lingua que conseguiu, a través dos seus programas, actividades e contidos, transmitirlle ao público infantil e xuvenil unha imaxe “prestixiada” e “dignificada” do galego, até o punto de chegar a ser na actualidade “un dos principais referentes culturais feitos no noso idioma” para a poboación infanto-xuvenil; referentes dos que a lingua “está urxentemente necesitada”, aseguraron.

A Mocidade pola Normalización Lingüística e o Colectivo de Nais e Pais polo Ensino en Galego aproveitan para lamentar tamén os “múltiplos problemas” aos que o Xabarín se viu sometido nos últimos anos. Os colectivos da asociación cidadá lembraron que os novos recortes “non son os primeiros” e que o espazo infantil “xa estivo practicamente desaparecido” da grella da TVG noutras ocasións “por decisións de orixe política”, retomándose nos últimos anos cunha “importante renovación” nas series, formatos e contidos feita posíbel grazas a un “equipo de profesionais comprometidos co proxecto que orixinou o Xabarín e dunha enorme valía”.

2008-01-25T12:23:00.000Z

VIA GALEGO.- A Fundación Via Galego pide máis peso específico da Galiza nas embaixadas que o Estado español ten nos países de lingua portuguesa
[17/01/2008]

O Estado español abrirá proximamente unha nova embaixada en Dili, capital de Timor Leste

No transcurso da XX Cimeira Hispanofrancesa celebrada o pasado 10 de xaneiro en París foi tratada, segundo diversos xornais internacionais, a posibilidade de o Estado español e francés abriren unha embaixada conxunta en Timor Leste, país asiático de lingua oficial portuguesa situado 500 quilómetros a norte da Australia.

Desde a Fundación Via Galego considérase esta unha ocasión propicia para reivindicar un maior peso da Galiza nas embaixadas que o goberno español ten abertas nos países de lingua portuguesa, polo que enviou cartas en tal sentido ao secretario de Estado de asuntos exteriores, Bernardino León Gross, e ao secretario xeral de relacións exteriores, Julio César Fernández Mato.

Trátase de promover o aproveitamento da ligazón lingüístico-cultural da comunidade autónoma galega coa lusofonía. “Este vínculo debería ser visto como unha vantaxe, unha riqueza, para o Estado”, asevera o presidente da organización galega, Carlos Callón, que acrecenta que “o lóxico é que a Galiza sexa a ponte de relacionamento natural entre o Estado español e os territorios de fala galego-portuguesa. Neste sentido o aumento do peso da Galiza nas embaixadas, sería un paso importante”.

Actualmente existen embaixadas españolas en Angola, Brasil, Cabo Verde, Mozambique, Portugal e São Tomé e Príncipe, países todos eles de lingua oficial portuguesa.

A Fundación Via Galego, declarada de interese público en outubro de 2006 e de interese galego en novembro do mesmo ano pola Xunta da Galiza, ten como un dos seus obxectivos propiciar un maior achegamento e relacionamento da Galiza cos territorios de lingua portuguesa, tentando pór en valor o idioma galego ao facer visíbeis as súas posibilidades comunicativas no plano internacional.

UN 12 DE XANEIRO DE 1912 NACE EN CELANOVA CELSO EMILIO FERREIRO

2008-01-11T12:56:00.000Z

Celso Emilio Ferreiro Míguez (Celanova, 6 de xaneiro de 1912 - Vigo, 31 de agosto de 1979) foi un escritor e político galeguista.

Era de familia acomodada campesiña e galeguista. Aos 20 anos, en 1932, organizou con Xosé Velo Mosquera, entre outros, as Mocedades Galeguistas de Celanova e participou na constitución da Federación de Mocedades Galeguistas en 1934. Pouco despois foi procesado por un artigo publicado en Guieiro, revista que el mesmo dirixía. Mobilizado para a Guerra Civil Española polas tropas de Franco, estudou Dereito, contribuíu en diversos xornais e revistas e en 1966 emigrou a Venezuela, onde colaborou coa "Hermandade Galega", fundou o "Patronato da Cultura Galega", e traballou no gabinete do Presidente Caldera.

Ao voltar da emigración instalouse en Madrid, onde traballou de xornalista. Ten prosa e poesía en castelán e galego, destacando na poesía en galego, de fundo contido social. Foi esta a que lle deu a sona de grande escritor.

Sinatura de Celso Emilio, sen data

Sinatura de Celso Emilio, cando tiña 17 anos, procedente do libro de preceptiva literaria Epístola á los pisones

Sinatura de Celso Emilio cando tiña 19 anos (29 de maio de 1929) procedente do libro de preceptiva literaria 'Epístola á los pisones'.

UN 11 DE XANEIRO DO ANO 1859 NACEU EN CARBALLO ALFREDO BRAÑAS

2008-01-11T12:45:00.000Z

Alfredo Brañas Menéndez (Carballo 1859 - Santiago de Compostela 1900), foi un escritor e ideólogo do rexionalismo galego decimonónico.

Fillo dun rexistrador da propiedade, pasou a infancia en Cambados. Entre 1869 e 1873 estudou o bacharalato en Santiago, e posteriormente estudou dereito na Universidade de Santiago de Compostela (USC). Trala morte do seu pai consegue rematar os seus estudos grazas á nai dun amigo que lle pagou a carreira, e xa mentres estudaba comezou a escribir na prensa, e o xornal compostelán El Porvenir dirixido por Antonio Toledo Quintela, foi o primeiro no que colaborou.

En 1878 ao remate dos seus estudos, volta a Cambados e traballa nunha notaría, en 1881 volta a Santiago para colaborar no novo diario de Antonio Toledo Quintela, El Libredón, e comeza a exercer de avogado e a participar nos círculos católicos-tradicionalistas da cidade e a escribir poesía en castelán, e en menor medida en galego. Entre 1884 e 1885 foi secretario xeral da USC. En 1885 escribe El Principio Fundamental del Derecho, no que recompila e resume as leccións que dera ese ano para poder obtar a unha praza de profesor auxiliar, que acaba conseguindo. Entre 1885 e 1887 foi o director de El Libredón, comeza colaborando co seu sucesor, El Pensamiento Galaico, pero acaba abandonándoo polo carlismo declarado do xornal.

En 1887 obtén por oposición a cátedra de dereito natural da Universidade de Oviedo, alí publica Fundamentos del Derecho de propiedad e xa en 1888 marcha de novo a Santiago ao obter a cátedra de economía política desa cidade.

En 1889 publica en Barcelona El Regionalismo. Estudio sociológico, histórico y literario, que foi aceptada por todos os sectores do galeguismo como un referente. En 1890 déuselle unha homenaxe en Santiago, que supuxo a primeira xuntanza de todos os galeguistas nun ambiente de unidade, independentemente das diferentes tendencias nas que se dividía, e constituíu o punto de partida da mobilización rexionalista. A obra tamén obtivo gran repercusión entre o rexionalismo catalán.

Brañas foi concelleiro en Santiago entre 1890 e 1891, e en 1890 participa na creación da Asociación Regionalista Gallega e escribe no seu voceiro, La Patria Gallega, no que Brañas fala por primeira vez de Galicia como nacionalidade. Participa nos Xogos Florais de Tui de 1891, nos que pola primeira vez nun discurso público emprega o galego, nese mesmo desaparece a ARG logo dun enfrontamento entre o sector liberal de Manuel Murguía e o católico tradicionalista de Brañas. Pero en xullo de 1892 Brañas e varios dos seus seguidores acoden á homenaxe a Murguía co gallo do seu nomeamento como bibliotecario da USC e dela xorde a encarga para Brañas de redactar as Bases generales del regionalismo y su aplicación a Galicia, as Bases, influenciadas polas Bases de Manresa, no que presenta un modelo práctico de descentralización. En 1893 participa na mobilización co resto dos rexionalistas contra do traslado ca capitanía xeneral da Coruña a León.

Viaxa a Cataluña como mantedor dos Jocs Florals de Barcelona en 1893, e xa antes publicara artigos comparando os rexionalismos galegos e cataláns nas publicacións barcelonesas La Renaixença ou La España Regional.
En 1894 publica Historia Económica e un Curso de Hacienda Pública en 1896 e nese ano estrea o drama La Voz de la Sangre y la Voz de la Patria.

Foi un dos fundadores do Ateneo León XIII (1896) en Santiago e o Círculo Católico de Obreros seguindo as directrices do papa León XIII no súa encíclica Rerum Novarum.

A crise do 98 vai provocar un certo enfriamento das súas posicións rexionalistas e o seu achegamento ao carlismo.

O rexionalismo de Brañas baseábase nun catolicismo e un historismo tradicionalista que lle serve para reclamar as liberdades antigas, ao tempo que arremete contra a industrialización, o liberalismo e o capitalismo, reclamanto a volta aos gremios.

AS TIC NA TÚA MAN

2008-01-10T21:23:00.001Z

PREME NESTA LIGAZÓN
http://www.congresointernetenelaula.es/congreso.gallego/index.congreso.html

2007-12-19T08:46:00.000Z

NO 20 DE DECEMBRO DE 1907 ESTRÉASE NO GRAN
TEATRO DA HABANA O HIMNO GALEGO

AUTOR: EDUARDO PONDAL

HIMNO GALEGO

¿Que din os rumorosos
na costa verdecente,
ao raio transparente
do prácido luar?
¿Que din as altas copas
de escuro arume arpado
co seu ben compasado
monótono fungar?

Do teu verdor cinguido
e de benignos astros,
confín dos verdes castros
e valeroso chan,
non des a esquecemento
da inxuria o rudo encono;
desperta do teu sono
fogar de Breogán.

Os bos e xenerosos
a nosa voz entenden
e con arroubo atenden
o noso ronco son,
máis sóo os iñorantes
e féridos e duros,
imbéciles e escuros
non os entenden, non.

Os tempos son chegados
dos bardos das edades
que as vosas vaguedades
cumprido fin terán;
pois, onde quer, xigante
a nosa voz pregoa
a redenzón da boa
nazón de Breogán.

GALEGUIZA TEU NOME E APELIDOS

2007-12-16T22:26:00.000Z

Lei 40/1999

Lei 40/1999, do 5 de novembro, sobre nome e apelidos e orde destes.(«BOE» 266, do 6-11-1999.)
EXPOSICIÓN DE MOTIVOS

A regulación existente no Codigo civil e mais na Lei do Rexistro Civil en materia de orde de inscrición de apelidos veu establecer ata o momento presente a regra xeral de que, determinando a filiación os apelidos, a orde destes será a paterna e materna; recoñécese tamén a posibilidade de o fillo modificar esta situación unha vez que alcance a maioría de idade.

Esta situación, que xa intentou ser cambiada con ocasión da modificación do Código civil operada pola Lei 11/1981, do 13 de maio, é a que se pretende modificar á luz do principio de igualdade recoñecido na nosa Constitución e en atención a distintas decisións de ámbito internacional adoptadas sobre esta materia. Abonde recordar, neste punto, que o artigo 16 da Convención de Nacións Unidas do 18 de decembro de 1979 prevé que os Estados signatarios tomen as medidas necesarias para facer desaparecer toda disposición sexista no dereito do nome; que o Comité de Ministros do Consello de Europa, desde 1978, establece na Resolución 78/37 a recomendación ós Estados membros de que fixesen desaparecer toda discriminación entre o home e a muller no réxime xurídico do nome e que o Tribunal Europeo de Dereitos Humanos sancionou, na sentencia do 22 de febreiro de 1994 no caso Burghartz C. Suisse, as discriminacións sexistas na elección dos apelidos.

É, por tanto, máis xusto e menos discriminatorio para a muller permitir que xa inicialmente poidan os pais de común acordo decidiren a orde dos apelidos dos seus fillos, no ben entendido de que a súa decisión para o primeiro fillo terá de valer tamén para os fillos futuros de igual vínculo, o cal non impide que, ante o non-exercicio da opción posible, debe rexe-lo disposto na lei.

Por outra parte, transcorridos máis de vinte anos desde a aprobación da Lei 17/1977, do 4 de xaneiro, sobre reforma do artigo 54 da Lei do Rexistro Civil, que establecía a posibilidade de substituí-lo nome propio polo seu equivalente onomástico en calquera das linguas do Estado español, atopámonos con que calquera cidadán que acade a maioría de idade e teña inscrito o seu nome en lingua castelá no Rexistro Civil, vese privado da posibilidade de que o seu nome propio sexa traducido a outra lingua española oficial.

Por todo iso, a lei que se aproba facilita o uso normal das diferentes linguas do Estado español e a obtención dun estatuto xurídico que respecte a súa riqueza idiomática.
Así mesmo, e polas mesmas razóns, a lei permite regularizar ortograficamente os apelidos cando a forma inscrita no Rexistro non se adecue á gramática e fonética da lingua española correspondente.

Polo demais, esta lei complétase cunha disposición transitoria que prevé o suposto de existencia de fillos menores de idade no momento da entrada en vigor daquela. A alteración da orde dos seus apelidos subordínase á necesaria audiencia, se tiveren suficiente xuízo.

Artigo 1º

O artigo 109 do Código Civil queda redactado nos seguintes termos:
«A filiación determina os apelidos conforme o disposto na lei.
Se a filiación está determinada por ambas liñas, o pai e maila nai de común acordo poderán decidi-la orde de transmisión do seu respectivo primeiro apelido, antes da inscrición rexistral. Se non se exercita esta opción, rexerá o disposto na lei.
A orde de apelidos inscrita para o maior dos fillos rexerá nas incricións de nacemento posteriores dos seus irmáns do mesmo vínculo.
O fillo, ó alcanzar-la maioría de idade, poderá solicitar que se altere a orde dos apelidos.».

Artigo 2º

O artigo 54 da Lei do 8 de xuño de 1957, do Rexistro Civil, queda redactado nos seguintes termos:
«Na inscrición expresarase o nome que se lle dá ó nacido, se ben non poderá consignarse máis dun mome composto, nin máis de dous simples.
Quedan prohibidos os nomes que obxectivamente prexudiquen a persoa, así como os diminutivos ou variantes familiares e coloquiais que non alcanzasen substantividade, os que fagan confusa a identificación e os que induzan no seu conxunto a erro en canto ó sexo.
Non se lle pode impor ó nacido nome que teña un dos seu irmáns, a non ser que falecese, así como tampouco a súa traducción usual a outra lingua.
Por petición do interesado ou do seu representante legal, o encargado do Rexistro substituirá o nome propio daquel polo seu equivalente onomástico en calquera das linguas españolas.»

Artigo 3º

O artigo 55 da Lei do 8 de xuño de 1957, do Rexistro Civil, queda redactado nos seguintes termos:
«A filiación determina os apelidos.
Nos supostos de nacemento cunha soa filiación recoñecida, esta determina os apelidos, podendo o proxenitor que recoñeza a súa condición de tal determinar, no momento da inscrición, a orde dos apelidos.
A orde dos apelidos establecida para a primeira inscrición de nacemento determina a orde para a inscrición dos posteriores nacementos con idéntica filiación.
Alcanzada a maioría de idade, poderase solicita-la alteración da orde dos apelidos.
O encargado do rexistro imporalle un nome e uns apelidos de uso corrente ó nacido a filiación do cal non os poida determinar.
O encargado do Rexistro, por petición do interesado ou do seu representante legal, procederá a regularizar ortogrficamente os apelidos cando a forma inscrita no Rexistro non se adecue á gramática e fonética da lingua española correspondente.»

Artigo 4º

Engádese unha disposición adicional segunda á Lei do rexistro Civil co seguinte texto:
«En tódalas peticións e expedientes relativos á nacionalidade e ó nome e ós apelidos, as solicitudes dos intresados non poderán entenderse estimadas por silencio administrativo.»

Disposición transitoria única

Se no momento de entrar en vigor esta lei os pais tivesen fillos menores de idade dun mesmo vínculo poderán, de común acordo, decidi-la anteposición do apelido materno para tódolos irmáns. Agora ben, se estes tivesen suficiente xuízo, a alteración da orde dos apelidos dos menores de idade requirirá aprobación en expediente rexistral, no que estes deberán ser oídos conforme o artigo 9 da Lei orgánica 1/1996, do 15 de xaneiro.

Disposición derrogatoria única

Queda derrogado o artigo segundo da Lei 17/1977, do 4 de xaneiro, sobre reforma do artigo 54 da Lei do Rexistro Civil. Así mesmo quedan derrogadas cantas disposcións xerais se opoñan ó establecido nesta lei.

Disposición derradeira única

A presente lei entrará en vigor ós tres meses da súa publicación no «Boletín Oficial del Estado». Dentro do prazo indicado, o Goberno procederá a modifica-lo Regulamento do Rexistro Civil no que resulte necesario para adecualo ó previsto na presente lei.

Galeguización de nomes e apelidos

¿Que se debe facer?

En primeiro lugar cómpre saber que toda a tramitación é de balde.

Os rexistros civís están comprometidos a encargárense de oficio das xestións diante dos organismos competentes (Real Academia Galega, ILG) sobre as formas galegas correctas de nomes e apelidos.

Se queres galeguizar o nome e/ou os apelidos na partida de nacemento.....

Debes ir ó rexistro civil onde estea rexistrado o teu nacemento e solicitar unha fe de vida. Unha vez esteas en posesión da fe de vida, debes presentar no mesmo rexistro unha instancia (xunto cunha copia do DNI e mais da fe de vida) en que se solicite a galeguización do nome e/ou dos apelidos, ó abeiro da Lei 40/1999.

Xa por último, cómpre solicitar a acreditación do rexistro onde se certifique o cambio.

Se queres galeguizar o nome e/ou os apelidos no carné de identidade...

Debes dirixir unha instancia á comisaría que che expediu o DNI, xunto coa antedita acreditación do rexistro civil, onde se solicite (ó abeiro da lei 40/1999) que se proceda á corrección do nome e/ou dos apelidos, rexistrándoos na súa forma actual.

Se queres galeguizar o nome e/ou os apelidos na restante documentación...

Para ir galeguizando progresivamente o resto da documentación persoal só é preciso solicitar o cambio. Para isto, na maior parte dos casos, abonda con presentar o DNI no que figuren a forma actual do nome e/ou dos apelidos.

Se a galeguización é denegada, caben os correspondentes recursos previstos na Lei do rexistro civil e no seu Regulamento.

2007-12-16T20:36:00.000Z

CANTOS MÁIS IDIOMAS FALEMOS MELLOR!!!
VELAÍ UN EXEMPLO

ILLA DE ONS

CULTURGAL 2011

Revista Umbrela Nº 16. Xuño 2011

Valoremos o que é noso!

As linguas suman

CONTACONTOS . CHARO PITA E TIM BOWLEY

TROPA DE TRAPO

TRABALLANDO A ORALIDADE...

17 de Maio.Día das letras Galegas con Uxio Novoneyra

Orgullosos do noso, orgullosos do galego.

Novo libro"55 mentiras sobre a lingua galega"

Guías de lectura para secundaria

ACHEGARTE, PROMOCIÓN DA CULTURA GALEGA

ANXO FARIÑA PRESENTANDO OS MEGATOXOS

Comentario falado do libro "rebeldes"

MAGOSTO 2009

1ª ASEMBLEA DA CGENDL.SANTIAGO 7-11-2009

DEBUXOS ANIMADOS , ANIMANDO Á PREVENCIÓN

Propostas para o consenso da Coordinadora Galega de ENDL.

PRECONCEPTOS SOBRE AS LINGUAS

RUBÉN RÍOS DIRECTOR DA CURTOMETRAXE COSER E CANTAR

MANIFESTO DA COORDINADORA DE ENDL DE GALICIA

APOIA COA TÚA FIRMA O IDIOMA

QUE É UN ENDL (Equipo de Normalización e Dinamización Lingüística)?

QUE É A COORDINADORA GALEGA DE ENDL?

QUE QUEREMOS?

O GALEGO NA COMUNICACIÓN CIENTÍFICA

17 MAIO. NA DEFENSA DO GALEGO

Os nenos/as saben falar galego e Galicia?

Visitounos Anxo Fariña

REGUEIFAS

MANIFESTO DA COORDINADORA DE ENDL DE GALICIA

Cine galego na TVG

REGUEIFEIROS NO ILLA DE ONS

FALAR E ESCOITAR EN GALEGO

Actividades do Equipo de Normalización e Dinamización Lingüística do IES Illa de Ons

Lamatumbá e o seu paraugas universal

FORO LETRAS VIVAS

HOXE 17 DE NOVEMBRO: TOCA MAGOSTO

A LITERATURA GALEGA RECIBE PREMIOS

GALEGUIZA COMO TE CHAMAS!!!

GALEGUIZA A TELEFONÍA MÓVIL

VIDEO EXPLICATIVO DO QUE É "PONTE NAS ONDAS"

COMO SE FIXO "PONTE DO MEU LADO"

NOVA ENTREGA DE POEMAS

RUXE-RUXE

EN DEFENSA DO GALEGO

MEMORIA DE ADÁN

REVISTA UMBRELA NÚMERO 10

DIARIOS DE ADRIANA E JACKY

17 de MAIO LETRAS GALEGAS 2008

XOSÉ MARÍA ÁLVAREZ BLÁZQUEZ

MANIFESTO DA MESA POLA NORMALIZACIÓN LINGÜÍSTICA

TAMARA GARCÍA PIÑEIRO

Son os teus bicos.

YOEL PARADA SANTOS

ESTRELLA PÉREZ PORTO

O meu amor por ti non o troco, ti a min trocaríasme?

AGUSTIN GALLEGO PIÑEIRO

PARA RELAXARSE UN POUCO!!!

UN 12 DE XANEIRO DE 1912 NACE EN CELANOVA CELSO EMILIO FERREIRO

UN 11 DE XANEIRO DO ANO 1859 NACEU EN CARBALLO ALFREDO BRAÑAS

AS TIC NA TÚA MAN

HIMNO GALEGO

GALEGUIZA TEU NOME E APELIDOS

XOSÉ MARÍA

ÁLVAREZ BLÁZQUEZ